Биз биламизки, 2022 — 2026 йилларга  мўлжалланган янги Ўзбекистоннинг тараққиёт стратегиясида, республикамиз ҳудудларида 200 та янги саноат зоналарини ташкил этиш ва бизнес-инкубаторлар тизимини ривожлантириш. Шароити оғир бўлган туманларда тадбиркорликни ривожлантириш учун янада қулай шарт-шароитлар яратиш белгиланган.

Мазкур тараққиёт стратегиясига асосан, ҳудудлар ўртасидаги иқтисодий  тенгсизликни қисқартириш, туман ва шаҳарларни уларнинг шароити, салоҳияти ва имкониятларидан келиб чиқиб ривожлантириш бўйича янгича  ёндошувларни жорий  этиш, шунингдек,  тадбиркорлик  муҳитини янада яхшилаш, давлат  кўмагини бериш тартибини такомиллаштириш мақсадида 2022 йилнинг 30 декабр кунида Ўзбекистон Президенти“ Республика ҳудудларини тоифаларга ажратиш ва тадбиркорликни қўллаб-қувватлашнинг табақалаштирилган тизимини жорий этиш чора-тадбирлари тўғрисида”ги Фармонни имзолади.

Фармонга бинон 2023 йил 1 январдан республиканинг 208 та туман ва шаҳарлари 5 та тоифага ажратилиб, туман ва шаҳар тоифасидан келиб чиқиб, тадбиркорларга солиқ имтиёзлари, субсидиялар берилиши  ҳамда 2023 йил 1 январдан 2026 йил 1 январгача солиқ солишнинг табақалаштирилган тартиби жорийэтилади:

Мазкур фармон билан айрим туманларда рўйхатдан ўтган ва шу ҳудудларда фаолият юритадиган тадбиркорлар фойда солиғи, айланмадан олинадиган солиқ ва ижтимоий солиқни 1 фоиз, юридик шахсларнинг мол-мулкига солинадиган солиқ ва юридик шахслардан олинадиган ер солиғини мазкур солиқлар бўйича ҳисобланган сумманинг 1 фоизи миқдоридаги солиқ ставкалари бўйича тўлаши жорий этилди.

Фармонга асосан, йирик солиқ тўловчилар, доимий муассаса, бюджет ташкилоти ва давлат корхонаси, устав жамғармаси (капитали)да давлат улуши 50 фоиз ва ундан кўпроқ миқдорда бўлган юридик шахслар бундан мустасно этиб белгиланган.

Шунингдек, айрим туманларда рўйхатдан ўтган ва шу ҳудудларда фаолият юритадиган ЯТТлар жисмоний шахслардан олинадиган даромад солиғининг қатъий белгиланган суммаларини тўлашдан озод қилинади.

Бундан ташқари, 2023 йил 1 январдан бошлаб, айрим туманларда рўйхатдан ўтган ва шу ҳудудларда фаолият юритадиган кичик тадбиркорлик субъектларига банкларнинг кредит ва лизинглари бўйича унинг асосий ставкадан ошган, бироқ Марказий банк асосий ставкасининг 40 фоизидан кўп бўлмаган қисмини қоплаш учун компенсация ҳамда банклар кредитларининг 75 фоизигача, бироқ умумий қиймати 2,5 миллиард сўмдан ошмаган миқдорда кафиллик тақдим этилади.

Ушбу Фармон билана ҳоли ва тадбиркорларга субсидия ажратишнинг оширилган миқдорлари ва тадбиркорлик фаолиятини туман ва шаҳарлар тоифаларидан келиб чиқиб қўллаб-қувватлаш чоралари тасдиқланди.

Шуни ҳам такидлаб ўтишимиз лозимки, фармонга асосан Тошкент вилояти Янгийўл тумани ихтисослашуви  ҳамда  кичик бизнес учун мавжуд  шароитлардан келиб чиқиб 3-тоифага ажратилган.

Хулоса қилиб айтганда, ҳудудларда тадбиркорликни қўллаб-қувватлаш, ишсизлик ва камбағалликни қисқартириш бўйича мавжуд тузилмалар фаолиятини такомиллаштириш,тадбиркорлик субъектлари ўз фаолиятини бошлаши учун зарур маълумотларни эркин фойдаланишга чиқариш. Қурилиш фаолиятида қурилиш нуқсонлари ёки муаммоларининг олдини олиш ҳамда иқтисодиётда давлат иштирокини қисқартириш ва хусусий секторга кенг йўл очиш. Иқтисодий муносабатларда эркин бозор тамойилларини жорий этишни кенгайтириш асосий мақсад этиб белгиланган.

 Янгийўл тумани адлия бўлими етакчи маслаҳатчиси Н. Анарқулова